മരണക്കാഴ്ച

മരണം
---------
ഏതോ അറിയപ്പെടാത്ത നാട്ടില്‍ വച്ച്
പോക്കറ്റില്‍ പേഴ്സോ
തിരിച്ചറിയല്‍ കാര്‍ഡുകളോ
അടയാളമോതിരങ്ങളോ ഇല്ലാതെ,
അല്ലെങ്കില്‍,
ഒരു വസ്ത്രം പോലുമില്ലാതെ
ഒരു വണ്ടിയിടിച്ച്
മുഖം അത്യന്തം വികൃതമാക്കപ്പെട്ട്,
പറ്റുമെങ്കില്‍,
ഒരു മുടിനാരു പോലും ശേഷിപ്പിക്കാതെ
കത്തിക്കരിഞ്ഞ് മരണപ്പെട്ടു പോകട്ടെ,
ഞാന്‍!

അപ്പനും മക്കളും ബന്ധുക്കളും അറിയാത്ത
അനാഥശവങ്ങള്‍ക്ക്
ജാതിയില്ലാതെ
സംസ്കരിക്കപ്പെടാനെങ്കിലും
ഭാഗ്യമുണ്ട്!


കാഴ്ച
---------

ഉരുണ്ടും ഇരുണ്ടുമിരിക്കുന്ന
കോണുകളിലേക്ക്
നീണ്ടു നീണ്ടു ചെന്ന്
കണ്‍മുനയൊപ്പിയെടുക്കുന്ന
പ്രതിഫലനങ്ങളെ
കണ്ണില്‍ തടഞ്ഞ്
കരളിലേക്ക് കടത്തി വിടാതെ
എന്‍റെ തലച്ചോര്‍!

കണ്ണു ചൊറിഞ്ഞ് ചൊറിഞ്ഞ്...
കാഴ്ച ചുകന്ന് ചുകന്ന്...

എനിക്കൊരുസാമൂഹ്യപരിഷ്കര്‍ത്താവാകണം!